قال ربنا في كتابه . . ولكل الرسل

و اللي بيهدينا إليه شرعه المبين

اللي ما يعطف ع اليتيم أو يحرمه

ح يكون له ويل . . يتعد عندي ما لهش دين

و اللي بياكل ماله . . يبقى بيملى بطنه م الحميم

و اللي بيأذي مشاعره يبقى شيطان رجيم

و اللي بيمسح شعره . . أو يعطف عليه

يتمد في عمره . . و يلقى نهايته جنة من النعيم

و اللي بيقسى عليه . . ده قلبه ما فهش رحمة

و يبقى للمولى ف يوم عرضه خصيم

و اللي يحبه ربه يكفل الطفل اليتيم

يضمن له واحة من الفردوس مع طه الكريم

وكفاية إن نبينا و سيدنا العظيم

في الأصل شاء المولى إنه يكون يتيم

طب ليه نشوف في بلادنا عيال ماليه الشوارع

بيدوسهم اللي مالهش قلب . . مع الرميم

ده الخير في أمتنا ليوم الدين إذا مديت إيديك

تساعد المسكين . . و تمسح دمع محروم أو حزين

مش بس بفلوسنا . . و لكن بابتسامة

و نظرة عطف . . و غنوة بتنسي الأنين

و ذي ما المسكين بيكون محتاج لعطفك

إنت محتاج له يصحي فيك نبضة حنين

و ذى ما أنت بتدي خير . . بتلاقي خير

ده احنا للخير و التواصل . . عطشانين . . و محتاجين

و ياما فيه ناس عندهم أبوين و من أغنى البشر

لكن لإحساسهم بالسعادة و الرضا

بيتعدوا حقيقي م الغلابة المحرومين

محمود نجم