مقهور و قهراني أنا

محشور في أرض الزنزنة

دايق مرارة عصر . . حابس

جوه صدري المدخنة

وولادي رايحه المدرسة

بين الهموم و العكننة

م الفجر مستنى ف طابور العيش

مواظب كام سنة

و الجو مليان بالسموم

و غذايا شبعان سرطنة

و الزحمة و الضوضاء إذا

راقت بيفضل طنطنة

محشور في قلب مواصلتي

معزول بداخل غرفتي

فيه اتهام بالبخل و التقصير

محاصرنى أنا

نفسي بقى أفرد جناحي

و ضهري . . ده الضهر انحنى

و الموت بقى أسلم طريق

للهروب م المعجنة

ما يجيش سيادي الأفاقين

و يمارسوا شغل الهيمنة

و لا يقدروش الجلادين

يوم يرجعونى للضنى

ولا يجبروني ف يوم أبارك

للكبير ع السلطنة

محمود نجم